2 Chronicles 21

1 Chronicles  «  2 Chronicles 20  ‹  2 Chronicles 21  ›  2 Chronicles 22  »  Ezra

ՅՈՎՐԱՄ ՅՈՒԴԱՅԻ ԹԱԳԱՒՈՐ (Դ. Թագ. 8. 16-24)

Յովսափատ իր հայրերուն հետ քնացաւ, եւ իր հայրերուն հետ Դաւիթի քաղաքին մէջ թաղուեցաւ։ Անոր տեղ իր որդին՝ Յովրամ թագաւոր եղաւ։

Ան եղբայրներ ունէր՝ Յովսափատի որդիները.— Ազարիա, Յեքիէլ, Զաքարիա, Ազարիու, Միքայէլ ու Սափատիա։ Ասոնք բոլորը Իսրայէլի թագաւորին՝ Յովսափատի որդիներն էին։

Անոնց հայրը շատ պարգեւներ տուաւ իրենց.— արծաթ, ոսկի ու թանկագին իրեր, նաեւ ¹ամրացած քաղաքներ՝ Յուդայի մէջ. բայց թագաւորութիւնը Յովրամի տուաւ, քանի որ ան էր անդրանիկը։

Երբ Յովրամ իր հօր թագաւորութեան ²գահին վրայ բազմեցաւ՝՝ եւ ուժովցաւ, իր բոլոր եղբայրները սուրով սպաննեց, նաեւ Իսրայէլի իշխանաւորներէն ոմանք։

Յովրամ երեսուներկու տարեկան էր՝ երբ թագաւոր եղաւ, ու Երուսաղէմի մէջ ութ տարի թագաւորեց։

Ան Իսրայէլի թագաւորներուն ճամբայէն ընթացաւ, ինչպէս Աքաաբի տունը ըրաւ, որովհետեւ իր կինը՝ Աքաաբի աղջիկն էր։ Տէրոջ ³առջեւ չարիք գործեց.

սակայն Տէրը Դաւիթի տունը բնաջնջել չուզեց, Դաւիթի հետ կնքած ուխտին համար, եւ անոր ու անոր որդիներուն ⁴ընդմիշտ ճրագ մը տալու խոստումին համար։

Անոր օրերը՝ Եդովմայեցիները Յուդայի ձեռքին տակէն ապստամբեցան, եւ իրենց վրայ թագաւոր մը նշանակեցին։

Յովրամ իր իշխանաւորներով ու բոլոր կառքերով գնաց. գիշերը կանգնեցաւ, եւ զինք շրջապատող Եդովմայեցիներն ու կառքերու վերահսկիչները զարկաւ։

Բայց Եդովմայեցիները Յուդայի ձեռքին տակէն ապստամբեցան մինչեւ այսօր։ Այդ ատեն Լեբնա ալ անոր ձեռքին տակէն ապստամբեցաւ, քանի որ ան Տէրը՝ իր հայրերուն Աստուածը լքած էր։

Ան Յուդայի լեռներուն վրայ բարձր տեղեր ալ շինեց, ու Երուսաղէմի բնակիչներուն պոռնկիլ տուաւ. նաեւ Յուդան խոտորեցուց։

Եղիա մարգարէէն գրութիւն մը եկաւ իրեն, որ կ’ըսէր. «Տէրը, քու հօրդ՝ Դաւիթի Աստուածը, սա՛ կը յայտարարէ. “Քանի հօրդ՝ Յովսափատի ճամբաներէն ու Յուդայի Ասա թագաւորին ճամբաներէն չընթացար,

հապա Իսրայէլի թագաւորներուն ճամբաներէն ընթացար եւ Յուդայի ու Երուսաղէմի բնակիչներուն՝ Աքաաբի տան պոռնկութիւններուն պէս պոռնկիլ տուիր, նաեւ քեզմէ լաւ եղող եղբայրներդ — հօրդ ⁵որդիները — սպաննեցիր,

ահա՛ Տէրը քու ժողովուրդդ, որդիներդ, կիներդ եւ ամբողջ ստացուածքդ մեծ պատուհասով պիտի զարնէ.

դուն ալ ⁶ծանրօրէն պիտի հիւանդանաս՝ ընդերքի հիւանդութեամբ, մինչեւ որ աղիքներդ դուրս ⁷թափին այդ հիւանդութեան պատճառով, որ օրէ օր պիտի սաստկանայ”»։

Տէրը Փղշտացիներուն ու Եթովպիացիներուն ⁸մօտերը բնակող Արաբներուն հոգին գրգռեց Յովրամի դէմ.

անոնք ալ Յուդայի դէմ բարձրացան, ⁹ներխուժեցին, եւ թագաւորին տան մէջ գտնուած ամբողջ ինչքը, նաեւ անոր որդիներն ու կիները ¹⁰յափշտակեցին. անոր ո՛չ մէկ որդի մնաց, բացի իր ամենէն պզտիկ որդիէն՝ Յովաքազէն։

Այս բոլոր բաներէն ետք՝ Տէրը զինք անբուժելի հիւանդութեամբ մը զարկաւ իր ընդերքէն։

Շատ մը օրեր ետք, այսինքն երկու ¹¹տարիի չափ ժամանակ անցնելէն ետք՝՝, իր հիւանդութեան պատճառով աղիքները դուրս ¹²թափեցան, ու ¹³չարչարալից հիւանդութեամբ մեռաւ։ Ժողովուրդը անոր վրայ խունկեր չծխեց, ինչպէս անոր հայրերուն վրայ ծխեր էր։

Ան երեսուներկու տարեկան էր՝ երբ թագաւոր եղաւ, եւ ութ տարի Երուսաղէմի մէջ թագաւորեց։ Ան ¹⁴մեռաւ առանց ոեւէ մէկուն իր վրայ ողբալուն՝՝։ Զայն Դաւիթի քաղաքին մէջ թաղեցին, բայց ո՛չ թէ թագաւորներու գերեզմաններուն մէջ։