Exodus 23

Genesis  «  Exodus 22  ‹  Exodus 23  ›  Exodus 24  »  Leviticus

ԱՐԴԱՐՈՒԹԻՒՆ

«Սուտ լուր մի՛ տանիր. ¹յանցաւորին հետ ձեռքդ մի՛ դներ՝ ²անիրաւ վկայ ըլլալու համար։

Չարիք ընելու համար բազմութեան մի՛ հետեւիր, ու դատի մէջ մի՛ ³վկայեր՝ շատերուն կողմը խոտորելով, իրաւունքը ծռելու համար։

⁴Չքաւորին աչառութիւն մի՛ ըներ՝՝ իր դատին մէջ։

Երբ քու թշնամիիդ մոլորած եզին կամ իշուն հանդիպիս, ա՛նպատճառ իրեն վերադարձուր զայն։

Եթէ քեզ ատողին էշը բեռի տակ ⁵ինկած տեսնես, հրաժարէ՛ զայն լքելէ. ա՛նպատճառ ազատէ էշը անոր հետ։

Քու աղքատիդ դատին մէջ անոր իրաւունքը մի՛ ծռեր.

Սուտ խօսքէն հեռո՛ւ կեցիր, եւ անմեղն ու արդարը մի՛ մեռցներ. որովհետեւ ես յանցաւորը պիտի չարդարացնեմ։

Կաշառք մի՛ ստանար. քանի որ կաշառքը աչքը բաց մարդիկը կը կուրցնէ եւ արդարներուն ⁶խօսքերը կ’եղծանէ։

Գաղթականը մի՛ տանջեր, որովհետեւ դուք գիտէք գաղթականին ⁷սիրտին վիճակը, որովհետեւ դուք ալ Եգիպտոսի երկրին մէջ պանդուխտ էիք»։

ԵՕԹՆԵՐՈՐԴ ՏԱՐԻՆ ԵՒ ՕՐԸ

«Վե՛ց տարի սերմանէ քու հողդ եւ անոր բերքը ժողվէ։

Բայց եօթներորդ տարին հանգի՛ստ ձգէ ու թո՛ղ զայն, որպէսզի քու ժողովուրդիդ աղքատները ուտեն, եւ անոնցմէ մնացածը դաշտին գազանները ուտեն. այգիիդ ու ձիթաստանիդ ալ նոյնպէս ըրէ։

Վե՛ց օր քու գործդ ըրէ, բայց եօթներորդ օրը հանգստացի՛ր, որպէսզի եզդ ու էշդ ալ հանգստանան, եւ աղախինիդ որդին ու գաղթականը շունչ առնեն։

Բոլոր ձեզի ըսածներուս ուշադի՛ր եղէք, եւ ուրիշ աստուածներու անունը մի՛ յիշատակէք, ո՛չ ալ քու բերանէդ թող լսուի»։

ԵՐԵՔ ՄԵԾ ՏՕՆԵՐԸ (Ելք. 34. 18-26, Բ. Օր. 16. 1-17)

«Տարին երե՛ք անգամ տօն կատարէ ինծի։

Կատարէ՛ Բաղարջակերքի տօնը. ինչպէս քեզի պատուիրեցի, եօ՛թը օր բաղարջ կեր Ապիպ ամսուան մէջ՝ սահմանուած ատենին, որովհետեւ այդ ամսուան մէջ Եգիպտոսէն ելար. ո՛չ մէկը իմ առջեւս պարապ ձեռքով թող երեւնայ։

Կատարէ՛ նաեւ գործերուդ — արտին մէջ քու սերմանածիդ — երախայրիքին Հունձքի տօնը, ու Բերքի տօնը՝ տարուան վախճանը, երբ արտէն քու գործերուդ բերքը ժողվես։

Տարին երեք անգամ քու բոլոր արուներդ թող երեւնան Տէրոջ՝ Եհովայի առջեւ։

Իմ զոհիս արիւնը խմորեալ հացով մի՛ մատուցաներ, եւ իմ տօնիս ճարպը մինչեւ առտու թող ⁸չմնայ։

Քու հողիդ առաջին երախայրիքը բե՛ր Տէրոջ՝ քու Աստուծոյդ տունը։ Ուլը իր մօր կաթին մէջ մի՛ եփեր»։

ԽՈՍՏՈՒՄՆԵՐ ԵՒ ՈՒՍՈՒՑՈՒՄՆԵՐ

«Ահա՛ քու առջեւէդ հրեշտակ մը կը ղրկեմ, որ ճամբան պահպանէ քեզ ու իմ պատրաստած տեղս տանի քեզ։

Ուշադի՛ր եղիր անոր եւ մտի՛կ ըրէ անոր խօսքը, մի՛ դառնացներ զայն. որովհետեւ ան ձեր յանցանքը պիտի չներէ, քանի որ իմ անունս անոր վրայ է։

Բայց եթէ ուշադրութեամբ անոր խօսքը մտիկ ընես ու իմ ամբողջ ըսածս գործադրես, քու թշնամիներուդ թշնամի պիտի ըլլամ եւ քու հակառակորդներուդ՝ հակառակորդ։

Արդարեւ իմ հրեշտակս քու առջեւէդ պիտի երթայ, ու քեզ Ամորհացիներուն, Քետացիներուն, Փերեզացիներուն, Քանանացիներուն, Խեւացիներուն եւ Յեբուսացիներուն պիտի տանի, ու ե՛ս պիտի անհետացնեմ զանոնք։

Անոնց աստուածներուն մի՛ երկրպագեր ու զանոնք մի՛ պաշտեր, եւ անոնց արարքներուն համեմատ մի՛ վարուիր. հապա բոլո՛րովին տապալէ զանոնք, ու անոնց արձանները բոլո՛րովին կոտրտէ։

Տէ՛րը՝ ձեր Աստուածը պաշտեցէք, եւ ինք պիտի օրհնէ քու հացդ ու ջուրդ։ Ձեր մէջէն հիւանդութիւնը պիտի վերցնեմ։

Քու երկրիդ մէջ վիժող եւ ամուլ պիտի չըլլայ։ Քու օրերուդ թիւը պիտի լրացնեմ։

Իմ երկիւղս քու առջեւէդ պիտի ղրկեմ ու խուճապի պիտի մատնեմ այն ամբողջ ժողովուրդը՝ որուն քով կ’երթաս. քու բոլոր թշնամիներուդ ⁹կռնակը քեզի պիտի դարձնեմ։

Եւ քու առջեւէդ իշամեղուներ պիտի ղրկեմ, որպէսզի Խեւացիները, Քանանացիներն ու Քետացիները քու առջեւէդ վռնտեն։

Անոնք քու առջեւէդ մէկ տարուան մէջ պիտի չվռնտեմ, որ երկիրը չամայանայ եւ դաշտին գազանները քեզի դէմ չբազմանան։

Զանոնք քու առջեւէդ քիչ-քիչ պիտի վռնտեմ, մինչեւ որ դուն ¹⁰բազմանաս ու երկիրը ժառանգես։

Քու սահմաններդ Կարմիր ծովէն մինչեւ Փղշտացիներուն ծովը, եւ անապատէն մինչեւ Եփրատ գետը պիտի դնեմ. որովհետեւ այդ երկրին բնակիչները քու ձեռքդ պիտի մատնեմ, ու դուն զանոնք առջեւէդ պիտի վռնտես։

Անոնց հետ եւ անոնց աստուածներուն հետ ուխտ մի՛ կնքեր։

Քու երկրիդ մէջ թող չբնակին, որպէսզի քեզի մեղանչել չտան ինծի դէմ. քանի որ եթէ անոնց աստուածները պաշտես, ատիկա անպատճառ քեզի որոգայթ պիտի ըլլայ»։