Exodus 38
Genesis « Exodus 37 ‹ Exodus 38 › Exodus 39 » Leviticus
ԶՈՀԱՍԵՂԱՆԻՆ ՇԻՆՈՒԹԻՒՆԸ (Ելք. 27. 1-8)
1Ողջակէզի զոհասեղանը սատիմի փայտէ շինեց։ Անոր երկայնքը հինգ կանգուն էր, լայնքը՝ հինգ կանգուն — քառակուսի էր —, եւ բարձրութիւնը երեք կանգուն։
2Անոր եղջիւրները անոր չորս անկիւններուն վրայ շինեց։ Եղջիւրները իրմէ առնուած էին. զայն պղինձով պատեց։
3Զոհասեղանին բոլոր առարկաները շինեց, այսինքն՝ կաթսաները, թիակները, կոնքերը, մսահաններն ու կրակարանները. անոր բոլոր առարկաները պղինձէ շինեց։
4Զոհասեղանին համար՝ անոր շրջապատին տակ, ներքեւը, գրեթէ մէջտեղը, պղինձէ ցանցակերպ կասկարայ մը շինեց։
5Պղինձէ կասկարային չորս անկիւնները չորս օղակ ձուլեց՝ ձողերուն անցընելու տեղեր ըլլալու համար։
6Ձողերը սատիմի փայտէ շինեց ու զանոնք պղինձով պատեց։
7Ձողերը զոհասեղանին կողմերը եղող օղակներուն անցուց, զայն անոնցմով կրելու համար։ Զայն տախտակներով շինեց՝ մէջը դատարկ։
ՊՂԻՆՁԷ ՍԵՂԱՆԻՆ ՇԻՆՈՒԹԻՒՆԸ (Ելք. 30. 18)
8Պղինձէ աւազանը ու անոր պղինձէ խարիսխը՝ Հանդիպումի վրանին մուտքը համախմբուող կիներուն հայելիներէն շինեց։
ՏԷՐՈՋ ՆԵՐԿԱՅՈՒԹԵԱՆ ՎՐԱՆԻՆ ՎԱՐԱԳՈՅՐԸ (Ելք. 27. 9-19)
9Յետոյ սրահը շինեց.— դէպի հարաւ՝ հարաւային կողմին համար՝ սրահին մանուած բարակ քթանէ վարագոյրները, հարիւր կանգուն երկայնութեամբ,
10իրենց քսան սիւներով եւ անոնց քսան պղինձէ խարիսխներով. սիւներուն ճանկերն ու անոնց կապերը արծաթէ էին։
11Հիւսիսային կողմին համար վարագոյրներ շինեց, հարիւր կանգուն երկայնութեամբ, իրենց քսան սիւներով եւ անոնց քսան պղինձէ խարիսխներով. սիւներուն ճանկերն ու անոնց կապերը արծաթէ էին։
12Արեւմտեան կողմին համար վարագոյրներ շինեց, յիսուն կանգուն երկայնութեամբ, իրենց տասը սիւներով եւ անոնց տասը խարիսխներով. սիւներուն ճանկերն ու անոնց կապերը արծաթէ էին։
13Արեւելեան կողմին համար ալ վարագոյրներ շինեց, յիսուն կանգուն երկայնութեամբ.
14մէկ թեւին համար վարագոյրներ շինեց, տասնհինգ կանգուն երկայնութեամբ, իրենց երեք սիւներով եւ անոնց երեք խարիսխներով,
15նաեւ վարագոյրներ՝ միւս թեւին համար — այսինքն սրահին դրան մէկ կողմէն ու միւս կողմէն, տասնհինգ կանգուն երկայնութեամբ, իրենց երեք սիւներով եւ անոնց երեք խարիսխներով։
16Սրահին շրջակայ բոլոր վարագոյրները մանուած բարակ քթանէ էին։
17Սիւներուն խարիսխները պղինձէ էին, սիւներուն ճանկերն ու անոնց կապերը՝ արծաթէ, եւ անոնց խոյակները՝ արծաթապատ. սրահին բոլոր սիւներն ալ արծաթէ կապեր ունէին։
18Սրահին դրան վարագոյրը ասեղնագործ էր, կապուտակէ, ծիրանիէ, կրկնակի կարմիրէ ու մանուած բարակ քթանէ շինուած, քսան կանգուն երկայնութեամբ. դրան լայնքին մէջի բարձրութիւնը՝ սրահին վարագոյրներուն համեմատ՝ հինգ կանգուն էր։
19Իր չորս սիւներն ու անոնց չորս պղինձէ խարիսխները շինեց. անոնց ճանկերը արծաթէ էին, անոնց խոյակները՝ արծաթապատ, եւ կապերը՝ արծաթէ։
20Խորանին ու շրջակայ սրահին բոլոր ցիցերը պղինձէ էին։
ՏԷՐՈՋ ՆԵՐԿԱՅՈՒԹԵԱՆ ՎՐԱՆԻՆ ՄԷՋ ԳՈՐԾԱԾՈՒԱԾ ՄԵՏԱՂՆԵՐԸ
21Ահա՛ւասիկ խորանին՝ այսինքն Վկայութեան խորանին հաշիւը, որ Մովսէսի հրամանին համաձայն՝ Ղեւտացիներուն պաշտօնին համար հաշուուեցաւ Ահարոն քահանային որդիին Իթամարի ձեռքով։
22Յուդայի տոհմէն Ովրի որդիին Ուրիի որդին՝ Բեսելիէլ ըրաւ ամէն ինչ որ Տէրը Մովսէսի պատուիրեր էր։
23Իրեն հետ էր փորագրիչ եւ հնարագէտ, կապուտակի, ծիրանիի, կրկնակի կարմիրի ու բարակ քթանի վրայ նկարակերտող Ոհողիաբ, Դանի տոհմէն Աքիսամայի որդին։
24Այս գործին համար գործածուած ամբողջ ոսկին,— այսինքն սրբարանին ամբողջ գործին 1ընծայուած ոսկին,— քսանինը տաղանդ ու եօթը հարիւր երեսուն սիկղ էր, սրբարանի սիկղին համեմատ։
25Համայնքէն թուարկուողներուն արծաթը՝ հարիւր տաղանդ ու հազար եօթը հարիւր եօթանասունհինգ սիկղ էր, սրբարանի սիկղին համեմատ։
26Քսան տարեկանէն վեր թուարկուելու համար անցնողները՝ մարդ գլուխ մէկական պեքա տուին, այսինքն՝ կէս սիկղ, սրբարանի սիկղին համեմատ. վեց հարիւր երեք հազար հինգ հարիւր յիսուն մարդ անցաւ։
27Սրբարանին խարիսխներն ու վարագոյրին խարիսխները ձուլուեցան հարիւր տաղանդ արծաթով. հարիւր տաղանդէն հարիւր խարիսխ շինուեցաւ, մէկ տաղանդ՝ մէկ խարիսխի համար։
28Իսկ հազար եօթը հարիւր եօթանասունհինգ սիկղ արծաթով սիւներուն ճանկերը շինեց, անոնց խոյակները պատեց եւ զանոնք կապեց։
29Երերցնելիք ընծային պղինձը եօթանասուն տաղանդ ու երկու հազար չորս հարիւր սիկղ էր.
30անո՛վ շինեց Հանդիպումի վրանին մուտքի խարիսխները, պղինձէ զոհասեղանը եւ անոր պղինձէ կասկարան, զոհասեղանին բոլոր առարկաները,
31շրջակայ սրահին խարիսխները, սրահին դրան խարիսխները, խորանին բոլոր ցիցերն ու շրջակայ սրահին բոլոր ցիցերը։