Numbers 36

Leviticus  «  Numbers 35  ‹  Numbers 36  ›  Deuteronomy 1  »  Deuteronomy

ԱՄՈՒՍՆԱՑԱԾ ԿԻՆԵՐՈՒՆ ԺԱՌԱՆԳՈՒԹԻՒՆԸ

Յովսէփի որդիներուն գերդաստաններէն՝ Մանասէի որդիին Մաքիրի որդիին Գաղաադի որդիներուն գերդաստանին նահապետները մօտեցան, Մովսէսի առջեւ ու իշխաններուն — Իսրայէլի որդիներուն նահապետներուն — առջեւ խօսեցան,

եւ ըսին. «Տէրը մեր տիրոջ պատուիրեց, որ երկիրը վիճակո՛վ իբր ժառանգութիւն տայ Իսրայէլի որդիներուն. ու Տէրը մեր տիրոջ պատուիրեց, որ մեր եղբօր՝ Սալպաադի ժառանգութիւնը անոր աղջիկներուն տայ։

Բայց եթէ անոնք Իսրայէլի որդիներուն ուրի՛շ տոհմերուն որդիներէն մէկուն կին ըլլան, անոնց ժառանգութիւնը մեր հայրերուն ժառանգութենէն պիտի պակսի, եւ այն տոհմին ժառանգութեան վրայ պիտի աւելնայ՝ որուն մէջ պիտի ըլլան. ուրեմն մեր ժառանգութեան վիճակէն պիտի պակսի։

Իսրայէլի որդիներուն Յոբելեանին՝՝ անոնց ժառանգութիւնը այն տոհմին ժառանգութեան վրայ պիտի աւելնայ՝ որուն մէջ պիտի ըլլան. այս կերպով անոնց ժառանգութիւնը մեր հայրերուն տոհմին ժառանգութենէն պիտի պակսի»։

Մովսէս Տէրոջ հրամանին համաձայն Իսրայէլի որդիներուն պատուիրեց. «Յովսէփի որդիներուն տոհմը շիտակ կը խօսի։

Ահա՛ւասիկ ինչ որ Տէրը պատուիրեց Սալպաադի աղջիկներուն մասին. “Անոնք թող կին ըլլան անոնց՝ ¹որոնց կը հաճին՝՝. սակայն միայն իրենց հօր տոհմին մէկ գերդաստանէն եղողներուն կին թող ըլլան,

որպէսզի Իսրայէլի որդիներուն ժառանգութիւնը տոհմէ տոհմ ²չանցնի. քանի որ Իսրայէլի որդիներէն իւրաքանչիւրը իր հայրերուն տոհմին ժառանգութեան պիտի յարի։

Ամէն աղջիկ՝ որ Իսրայէլի որդիներուն տոհմերուն մէջ ժառանգութեան մը կը տիրանայ, իր հօր տոհմին մէկ գերդաստանէն եղող մէկուն կինը թող ըլլայ, որպէսզի Իսրայէլի որդիներէն իւրաքանչիւրը իր հայրերուն ժառանգութեան տիրանայ։

Ժառանգութիւնը տոհմէ տոհմ թող չանցնի, հապա Իսրայէլի որդիներուն տոհմերէն իւրաքանչիւրը իր ժառանգութեան թող յարի”»։

Սալպաադի աղջիկները ըրին այնպէս՝ ինչպէս Տէրը Մովսէսի պատուիրեց։

Արդարեւ Սալպաադի աղջիկները՝ Մահալա, Թերսա, Էգղա, Մեղքա ու Նուա՝ իրենց հօրեղբօրորդիներուն կիները եղան.

այսպէս՝ Յովսէփեան Մանասէի որդիներուն գերդաստաններէն եղողներու կին եղան, եւ անոնց ժառանգութիւնը իրենց հօր տոհմին ու գերդաստանին մէջ մնաց։

Ասոնք են այն պատուիրաններն ու կանոնները, որ Տէրը Մովսէսի ³միջոցով Իսրայէլի որդիներուն պատուիրեց Մովաբի դաշտերուն մէջ, Երիքովի դիմաց, Յորդանանի մօտ։